提一提你，呢篇文係屬於「GAGS」的文章，如果你硬係要用批判性嘅目光黎睇，我幫你唔到。 由學聯與學民宣布在政總集會，到重奪公民廣場失敗、警方出動催淚彈、市民自發佔領、疑似警黑勾結衝擊集會人士，再到近日政府與學聯的談判、梁振英又涉貪，一連串嘅事情已經開展了接近兩個禮拜，最後的結果係點冇人會知，但要數目前贏得最大「階段勝利」的，就一定要數以下幾個單位！ | |
1. 麥當勞（及各大24小時營業的食肆）
上星期一我哋落去銅鑼灣現場當日，下午三四點就已經傳出怡和街的麥當勞已經冇包賣，再過多陣仲有人話連蘋果批同麥樂雞都掃走埋。之於海富中心樓下間麥當勞就更加係人山人海。當隔離兩間食肆一到傍晚6點就落閘放狗之際，唯有24小時麥當勞一直開門營業，不單止為集會人士提供廁所，更加提供全天候食物供應。君不見早個令月麥當勞被福喜事件搞到雞毛鴨血，經此一役仲有邊個會記得佢啲嘢食仲安唔安全？ | |
2. 港鐵
(圖:見水印) 封路、改道，唔單止往返集會地點的人士會坐地鐵，連好多平日坐其他車返工嘅人都唯有要坐地鐵。但對港鐵黎講，最大的得益唔係賺多咗車資，而係大量免費廣告。例如集會頭幾日就已經有人轉載一段「西鐵車長多謝香港市民」的片段，為港鐵加咗唔少形象分。再加上港鐵自己又生生性性，冇重大延誤同故障，近日仲有多位藝人因為封路而要坐地鐵，仲個個都讚好快添！贏車資，贏埋免費宣傳，贏哂啦！ | |
3. 各大五金鋪
大部份香港人真係好日都唔會行入五金鋪，但今次就為咗一個口罩、一個眼罩而交出自己嘅第一次。尤其是平時只有專業人士先會用到、而且有排都唔會換嘅燒焊用口罩，眼罩，更加被譽為抵擋胡椒噴霧同催淚彈的神器！再加上集會場地被衝擊後的頭盔，真係貨如輪轉架！ | |
4. 雜貨鋪
被評為「攻擊性武器」的保鮮紙同遮、護身法寶中的毛巾、退熱貼，都可以在雜貨鋪買到，而且大都是消耗品。再加上有市民不停將以上物資捐贈給急救站、物資站，令會場成為以上物資的集散地。曾經有朋友戲言如果你依家發燒，最應該去嘅地方就係金鐘會場－又有退熱貼又人濕毛巾，仲有人拎水拎嘢食比你，空氣仲鬼咁好，除咗笪地硬咗少少之外真係Perfecto架！ | |
5. MK仔 旺角一役，令好多人發現「MK仔」同「黑社會」，原來都係有層次嘅差別。由一開始的「霓虹重Bass貨車」，到後來旺角現場被衝擊的守望相助，MK仔嘅表現竟直令人刮目相看！連一向望多佢兩眼都要Hi Auntie嘅MK仔竟然會為咗守衛一碌柱、一個帳篷而甘心低頭比人圍X，為咗保護隔離嘅學生、女士而挺身而出，呢份忍耐力真係唔係個個有，搞到我依家出街見到啲MK仔都好似順眼咗咁！MK仔你好嘢！ | |
6. 香港市民
正如以上話齋，成件事嘅最終結果會係點，冇人知；究竟有冇普選，話唔埋。之但係喺呢短短個令禮拜，香港人就展示出令人佩服的公民意識、令理應沙塵滾滾的鬧市成為一個「心靈綠洲」，贏得世界各國大部份新聞評論的認同，香港人係好嘢嘅！ |
