羽毛球作為一項老少咸宜嘅運動，相信唔少人都有打過，不過真正知道比賽規則嘅朋友可能並唔係好多。去年年底，世界羽毛球聯會有意更改有關發球的規則，而近日有關規例嘅修改已經通過，最快3月14日就會喺全英公開賽正式執行。對於呢次世界羽聯嘅修例，有唔少身高較高嘅球手都相當不滿，其中包括目前世界排名第一嘅丹麥球手Viktor Axelsen。

首先講番今次修例，目前發球嘅高度規定唔可以過腰，因此身高較高嘅球手喺發球時往往都擁有更好嘅主動權，相反較矮嘅球手因為避免對方衝上前殺網，所以更多都只能選擇開出更安全嘅高遠球。對於呢種身高上所存在嘅唔公平，世界羽聯決定將發球高度統一，規定唔可以超過1.15m，咁樣就可以避免以往嘅唔公平。

不過，統一發球高度至1.15m，導致部份真係好高嘅球手難以發球，其中Axelsen就搵黎身高達2m嘅球手黎示範一下發球會變得幾咁困難。