| 雖然依家先黎講好似有啲遲，但相信過去呢個新年假各位男士都好掙扎：究竟陪老婆/女朋友去拜年好呀，定係留喺屋企刷滅盡龍好呢？而喺呢個時候，你女人就會同你講「咁大個人仲打咩機呀？冇益呀！打完個人又勁暴燥！」諗起自己平時打輸FIFA掉掣你又真係未必識駁佢，但睇完呢篇嘢你就識架啦。 | |
 |
|
| 根據英國《獨立報》報導Dave TV做嘅一個問卷調查，1000名18-30歲受訪者中有55%人認為打機有助減壓，當中最主要嘅原因係打機容許佢哋「逃避現實(Escapism)」，亦即係放低現實日常生活、工作上嘅煩惱，27%人更認為打機有幫助佢哋面對情緒問題。有47%人更加認為喺遊戲世界中嘅出色表現，會令佢哋面對現實生活時更加正面。另一方面，有60%受訪者認為打機已經係佢哋日常社交生活一部份，證明遊戲世界或者係虛擬，但其好處就絕對可以影響現實生活。 | |
 |
|
| 而由University of Central Florida學生Muchael Rupp於上年進行嘅調查亦發現，於工作中放個「打機Break」都有助舒緩壓力。佢搵黎66位受訪者先做一個令人「認知疲倦(Cognitive Fatigue)」嘅工作，然後有一個5分鐘嘅小休。小休時受訪者可以揀玩一個輕鬆電子遊戲、參加一個有人指導嘅放鬆活動，以及坐喺到咩都唔做。事後發現只有打機嗰班小休後「感覺更加好」，放鬆活動嘅就覺得「冇咁差」，而齋坐嗰班直頭覺得心不在焉，反而更加擔心工作。所以話打機係咪好過齋坐喺到呢？ | |
 |
|
| 好啦，如果你咁同女朋友或者老婆講，佢實會應你「咁你即係話同我一齊生活好大壓力啦？」放心，佢有張良計，我有過牆梯。根據英國約克大學嘅Digital Creativity Labs於上年做嘅一個研究，MOBAs(Multiplayer Online Battle Arenas)，即係《League of Legends》以及《DoTA》之類遊戲，發現於MOBAs表現好嘅玩家，喺傳統嘅IQ測試中表現亦會比較好。當中嘅原因係MOBAs對玩家嘅要求同IQ測試基本一致。要注意嘅係研究結論唔係話你打得MOBAs多就會變聰明，而係「MOBAs打得好個人應該會喺IQ測試高分啲」，所以「打機會變聰明」呢句嘢係唔成立嘅——不過有時說話又唔使講得咁清楚嘅係咪？你淨係同女朋友講：打機嘅人聰明啲，我揀咗你呀你睇我幾聰明！連消帶打仲唔係你贏哂！ | |