| 「腰纏」，唔一定只係膽拖「萬貫」。大把武俠片同港漫都設定過啲武者將軟劍纏喺腰間，現代就有陳浩南腰纏開片用嘅鐵鏈，超現實就有《龍珠》班撒亞人收埋條尾喺腰，仲有最令人O嘴嘅《3D肉蒲團》雷凱欣飾演嘅極樂老人李長周（唔Google都未必記得佢叫咩名），居然係捲埋條J喺腰度！ 好，講完題外話，今次其實係想講，匈牙利有位應用藝術學院嘅畢業生Ádám Török，竟然諗到將成架滑板車纏喺腰間，唔踩嗰陣就纜住佢周圍走，要踩嗰陣先抆佢出嚟放番落地，真係幾有諗頭。 | |
| |
| 呢架腰帶滑板車係Ádám Török嘅畢業作品，由於幾受矚目，所以將會喺今年嘅布達佩斯設計周入面展出。架車係用膠板同鐵製成，踏板位整成弧形，手把位亦可以屈曲，所以能夠纏腰。佢嘅重量係1.7kg，纜喺腰一陣間應該冇問題，但全日咁纜睇怕都幾係嘢，同埋踏板位都幾細，大份人士相信踩唔到，踩到都怕踏板負荷唔到會斷，可能Ádám Török係幾細粒的。所以，筆者覺得呢個設計嘅最大好處係，其實架車一定唔會俾人偷！ | |
| |
