柝智星呢個名相信作為球迷嘅你無可能唔識，佢可以話係近代最成功嘅韓國球員，要知道佢曾經踢過英超嘅曼聯，單係呢一點已經唔容易，更何況當時嘅佢係球隊其中一位核心，兼且係領隊費格遜最愛嘅球員之一。

朴智星無非常出色嘅腳下技術，但係仍然能夠令費Sir咁鍾意，其中一點就係佢喺球場上總係不惜一切咁去跑動，就好似擁有無限體力、無限氣一樣，喺防守端可以帶比對手更大嘅壓力，而進攻端亦可以好快咁轉守為攻，從而進行突擊。

可能你會覺得，星仔黎自韓國好大機會就係憑住韓國特產人參去令佢不斷咁補氣，但日前佢就透露自己擁有無限氣嘅來源，原來並唔關人參事，其實係靠 - 青蛙湯！

星仔表示，自己由於細個嘅時候太瘦弱，而父親聽聞青蛙嘅汁液可以令人身體強壯及更有力量，因此佢就去捕捉野生青蛙去煲湯比星仔飲。

星仔表示青蛙湯嘅味道非常難飲，但佢又好想做足球員，而所有人都同佢講飲左佢就會更強壯，所以佢就強迫自己不斷飲，從而改善自己嘅健康。

最終，星仔如願成為一名職業足球員，並喺2005年夏天加入曼聯，隨後一共效力紅魔鬼長達7個球季，合共上陣205場比賽攻入27球，同時隨隊奪得4次英超冠軍、3次聯賽盃冠軍、4次社區盾冠軍、1次歐聯冠軍及1次世冠盃冠軍。

唔知聽到朴智星嘅經歷之後，你今日開始會唔會走去捉青蛙去煲湯呢？