如今嘅NBA係小球戰術嘅天下，比賽主張高速度及三分球，因此變相令嘅傳統中鋒慢慢被淘汰，以往籃球嘅「一吋高一吋強」嘅講法好似已經唔再適用。不過，事實又係咪真係咁呢？擁有絕對身體優勢嘅中鋒係咪真係得物無所用呢？

睇番新生代嘅中鋒球員Joel Embiid及Karl-Anthony Towns，佢地兩位都係各自球隊嘅核心，雖然與傳統中鋒有啲唔同，佢地都會走出三分線投射，但係佢地嘅身體優勢喺防守端還是有一定作用的，特別係Embiid更加憑住出色嘅身體能力鎮守住76人嘅禁區，大大減低對方喺籃底下完成得分嘅機會。

而喺黎緊嘅夏天，NBA可能又多一位身體質素驚人嘅新秀，佢就係身高7呎1吋嘅Mohamed Bamba。就咁睇7呎1吋可能你唔覺得有幾特別，但係佢日前喺新秀體測入面度出7呎10吋嘅臂展，呢個結果打爆左NBA新秀歷史紀錄。而除左臂展之外，Bamba嘅站立摸高數據亦都達到293cm，呢個結果亦都係新秀體測歷史之冠。

而究竟7呎10吋嘅臂展有幾恐佈？你睇下以下幾位擁最長臂展嘅中鋒當年嘅體測數據你就會明白：

Rudy Gobert（臂展7呎8）- 2013年

Hassan Whiteside（臂展7呎7）- 2010年

JaVale McGee（臂展7呎6）- 2008年

Alexis Ajinca（臂展7呎8）- 2007年

由於擁有令人震驚嘅臂展，Bamba喺岩岩呢一季為德薩斯大學場均貢獻3.7個封阻，絕對係一名防守悍將。而除左防守之外，佢亦都能夠場均交出12.9分10.4籃板，如果將精神都放喺防守端嘅話，佢可能會成為一名非常恐佈嘅禁區守護神。

憑住咁出色嘅身體天賦，外界預計Bamba喺今夏好大機會成為選秀前十順位嘅新秀，甚至有機會挑戰前五順位。不過，Bamba對於自己卻信心十足，佢認為自己絕對應該係狀元之選，甚至覺得如果唔係狀元就已經算係失敗。

不過，如果單計今夏有機會進入NBA嘅大個子，黎自阿利桑拿大學嘅Deandre Ayton(7呎1吋)則要比Bamba更被看好，無論投籃命中率同三分球命中率都要比Bamba更出色。

已經手握狀元籤嘅太陽隊，將好大機會選擇一名內線球員，因佢地外線已經有Devin Booker呢位基石，所以加強內線係佢地嘅首選，到時一內一外相信佢地嘅實力會有大幅度嘅提升。