| 唔知係咪因為早排套《聖鬥士星矢：聖域傳說》電腦動畫劇場版反應唔錯，搞到車田正美老師、東映同BANDAI再次心紅，喺冇耐前公布咗2015年春季又會有新嘅大project。 個project係乜？尋日BANDAI終於喺今年嘅TAMASHII NATION魂ネイション展覽發布會上面畀提示大家。原來個project叫做「黃金魂」，一千零一張官圖係畫住動畫版嘅獅子座，不過佢套黃金聖衣嘅背脊竟然好似飲咗Red Bull咁多咗一對翼，所以係人都估好可能係獅子座嘅神聖衣！ | |
| |
| 見到有動畫圖片，《聖鬥士星矢Ω》動畫又已經完咗，fans好自然會諗《黃金魂》會唔會係下一套黃金聖鬥士做主角（或只係獅子座）嘅動畫？班黃金着晒神聖衣打唔知咩敵人，真係諗起都興奮！不過佢哋唔係爆嘆息之牆死晒咩？ 呢方面東映仲賣緊關子，但賣玩具大過天嘅BANDAI就理得你，已經率先畀人預覽定呢隻有翼獅子座嘅聖衣神話。出得神話，即係明示暗示有動畫啦，萬一12件黃金聖衣真係變晒神聖衣，聖衣神話咪出多10年都仲有得出？ | |
| |
| 睇番呢套獅子座聖衣設定嘅全相，中國風好濃喎，似麒麟多過似獅子，仲好似crossover咗《天空戰記》添。話時話，當年《聖鬥士星矢G》漫畫又係獅子座做主角，初代聖衣神話嘅黃金聖衣又係出獅子座先，今次又係，睇嚟官方好似特別鍾意獅子座咁喎。 | |
| |
