成日都話現代人個個患晒「手機依存症」，24小時都做低頭族，玩少陣電話都唔得。如果你都覺得自己有呢方面問題，希望戒咗成日玩手機嘅壞習慣，不妨試試以下呢個喺日本Twitter上瘋傳嘅「密實手機殼」！

出身於多摩美術大學嘅網友よしだ成日都喺Twitter上發表有趣發明，今次佢就設計出可以「解決手機依存症嘅手機殼」，就係直接落閘鎖住部機，等自己冇手機用！

見自己部手機被重重包圍，仲要用埋鎖匙先可以打開部手機，真係唔係咁隨心所欲想玩電話就玩電話，睇嚟真係可以幫助各位低頭族去戒呢鋪「癮」，但萬一唔見咗條鎖匙，咁究竟又要點解決呢……