今屆世界盃可以話係歷史上最難以預測嘅一屆，因為有部份被評為熱門球隊嘅卻踢唔出表現，而被睇淡嘅則可以踢出令人驚喜足球。而作為上屆亞軍嘅亞軍廷，Sorry應該係阿根廷先岩，今屆嘅表現絕對係令人非常失望，先係第一戰被冰島迫和，其後更被克羅地亞淨勝3球，雖然話就話仲有機會出線16強，但係佢地嘅表現實在令人無眼再睇。

作為阿根廷領軍人物嘅美斯，貴為地球上最出色嘅球員之一，佢當然受盡全世界嘅關注，其中亦都包括場上嘅對手。最終經過兩場比賽，美斯可以話接近毫無表現，喺場上亦都成日頭耷耷，完全表現唔出大將之風，而阿根廷兩戰只有1分出線成疑。

而今日美斯亦迎來自己31歲嘅生日，如果今屆都係未能捧起世界盃，相信來屆35歲嘅美斯就更加難有所表現。甚至近日亦有傳聞指，如果阿根廷就咁喺小組賽出局，美斯等多位主力將會再次退出國家隊。

美斯接受訪問時表示：「世界盃對於阿根廷及我自己亦都有特別嘅意義，我一直抱有舉起世界盃冠軍獎盃呢個夢想，並為此感到興奮。我想信如果我真能達成呢個夢想，數以百萬計嘅阿根廷人民都會為此感到高興。所以我地唔可以放棄呢個夢想！我已經贏得所有大賽獎項，但我並未覺得已經到要結束嘅時候，我唔會喺未拎到世界盃冠軍之前就退役的！」

作為阿根廷球迷嘅，聽到美斯唔會放棄世界盃冠軍應該會安心一點，但係以今屆佢地嘅表現相信能夠出線16強已經係奇蹟，更何況要複製上屆打入決賽，甚至奪得冠軍。而如果再等下一屆，35歲嘅美斯仲會唔會保持得目前嘅表現令人質疑，同埋核心係阿根廷足總嘅混亂如果唔能夠解決，相信國家隊要再打出好表現都未係唔係一件容易嘅事。