環法單車賽目前已經完成左15站，仲有6站就會完成今年嘅賽事。而就喺岩岩呢個分站入面，黎自天空車隊嘅車手Gianni Moscon出現嚴重嘅違例，隨即被賽會取消資格！

Moscon係天空車隊主力Geraint Thomas嘅副手之一，但就喺第15站嘅路途期間，呢位24歲年輕車手突然轉身襲擊身後Fortuneo–Samsic車隊Elie Gesbert嘅頭部，而施襲過程全程被拍攝落黎，所以賽會亦可以好快就對Moscon作出裁決。

其實，Moscon已經唔係第一次被指違規，去年佢已經被指控故意造成瑞士車手Sebastien Reichenbach撞車意外，但由於欠缺實際證據，所以Moscon並未被任何處罰。另外，喺2017年Moscon則因對車手Kevin Reza作出種族歧視行為，所以被禁賽6個星期。

天空車隊嘅話事人就指將會對Moscon作出裁決，睇下使唔使有進一步嘅紀律處分。

其實睇番當時嘅情況，實在難以理解Moscon咁樣襲擊Gesbert有乜謂，對方又有頭盔，可以話對對方接近無任何影響，但係佢自己就被取消資格，實在係非常愚蠢嘅決定。