喺岩岩嘅俄羅斯世界盃，雖然墨西哥喺16強不敵巴西出局，但係喺呢場比賽入面佢地嘅門將奧祖亞「Sam哥」卻表現神勇，多次救出巴西嘅必入球，全場落黎佢竟然有多達13次成功嘅撲救，而今屆世界盃則累積貢獻25次撲救，係今屆第一位撲救次數超過20次嘅門將。

憑住出色嘅表現，33嘅「Sam哥」成功獲得意甲球隊拿坡里嘅垂青，由於呢支上季意甲亞軍有正選門將連拿離隊，再加上用左3500萬歐元新簽番黎嘅Alex Meret喺近期嘅訓練中手臂骨折，所以拿圾里嘅門將位置陷入缺人嘅境地，而「Sam哥」將可以成為佢地嘅救命稻草。

目前拿坡里方面已經接觸左「Sam哥」嘅經理人，而由於佢與標準列治嘅合同明年夏天就會到期，所以預計拿坡里方面將可以用較抵嘅價錢去得到呢位擁有神勇表現嘅門將。

其實「Sam哥」喺上屆世盃表現已經令人印象深刻，但始終都無大球會願意簽佢，佢生涯效力過最有名嘅球隊就只有西甲嘅馬拉加(2014-2017)，而效力最長時間嘅則係墨西哥美洲隊(2004-2011)。

可能有朋友唔知點解奧祖亞比人叫「Sam哥」，咁係因為佢同香港演員吳鎮字外貌非常相似，而衝上雲霄入面「Sam哥」一角則最令人印象深刻，所以奧祖亞就被人稱為「墨西哥Sam哥」啦！