近期，曼聯領隊摩連奴同球會嘅關係有惡化嘅跡象，除左球隊熱身賽表現令人失望之外，球會亦都對摩帥買人嘅要求視若無睹，令呢位狂人領隊大感無奈。不過正所謂馬死落地行，既然球會唔肯花錢去買佢想要嘅球員，咁佢只可以從現有嘅入手去諗辦法，其中改造球員係一個可行嘅方法。

較早前曼聯喺面對利物浦嘅熱身賽入面，被對方大炒1:4，雖然只係一場熱身賽，但係後防問題絕對不容忽視，而由於曼聯球會方面並未有買人嘅計劃，所以摩帥已經有後備方案，就係將防守中場馬迪改造成中堅。

摩帥呢個諗法其實都唔係唔可行，因為曼聯本身已經擁有唔少中場，好似普巴、靴里拉、費蘭尼、迪加特，所以中場可以話人滿為患，將陣中表現最穩定嘅馬迪改造從而釋放中場人手選擇亦絕對係一舉兩得。

身高達1.94m嘅馬迪，身型上絕對適合當中堅，佢將可以保持禁區中嘅制空力，而佢嘅位置感、防守能力亦絕對有能力充當門將前最後一道屏障。

被迫將馬迪改造，只因曼聯兩位中堅鍾斯及史摩寧表現未達預期，而連達洛夫又未證明自己，拜利又受傷。另外，盧祖近期又同狼隊扯上關係，可能會被交易掉。

自從費格遜時代之後，曼聯近年都無出到一位表現令人滿意嘅中堅，如今將馬迪移後改造成中堅，係有機會臨時改善球隊嘅防守。不過，同時摩連奴需要犧牲球隊中場防守嘅實力，要知道上面提到嘅幾位中場防守力遠遠不及馬迪，而穩定性亦難以同塞爾維亞人相提並論。