近年，足球界可以話陷入天價買人嘅時代，尼馬創紀錄以2.22億歐元轉會巴黎聖日耳門，麥巴比又以1.9億歐元同樣加盟聖日耳門，令人咋舌億億聲嘅轉會時代好似突然就降臨球壇。

而喺C朗拿度宣佈離開皇馬加盟祖雲達斯後，外界一直期待專門天價買巨星嘅皇馬將購入邊一位球星以取代呢位5屆金球獎得主，其中傳聞會收購嘅球員包括夏薩特、尼馬、麥巴比等，而夏薩特就更公開表示自己希望可以加盟皇馬，不過車路士就將呢位比利時球星開價2億歐元嘅天價。

確實，夏薩特雖然未能夠帶領比利時問鼎世界盃冠軍，但佢嘅表現已經係技驚四座，係今屆世盃表現最好嘅球員之一。如果能夠將夏薩特納入陣容當中當然令人高興，但係如今嘅皇馬已經唔再麻木收購巨星，佢地內部更加有共識認為除左尼馬之外，無一名球員嘅轉會身價應該超過1億歐元，所以對車路士嘅開價當然地拒絕了。

既然唔買夏薩特，咁邊一位球員可以頂替C朗離開後嘅位置呢？皇馬新任領隊盧比迪古就比出自己心目中嘅名字 - 阿辛斯奧。當然，如今嘅阿辛斯奧無論邊一方面都難以同C朗拿度比較，但係佢嘅潛力及可以成長嘅空間絕對可以被更多地開發，因為佢而家就只係22歲。

盧比迪古目前認為阿辛斯奧將會係取代C朗位置嘅第一人，佢希望可以重點培養呢位年輕球員，並將佢打造成下一位超級巨星。除左佢之外，皇馬目前陣容中擁有多位非常年輕但就天賦驚人嘅球員，其中好似以4500萬歐元簽下嘅18歲巴西小妖雲尼斯奧斯，預計都會係皇馬重點培訓嘅球員之一。

以目前嘅情況黎睇，皇馬黎緊應該都唔會再有大手交易，佢地新球季嘅核心將會係世界盃金球獎得主摩迪，而前鋒線則會以巴利及賓施馬掛帥，再由阿辛斯奧填補C朗嘅位置，後者上季亦為皇馬入過唔少靚波，其中更包括重要嘅入球，所以新一季球迷們可以對佢有更多的期待！