41歲仲可以征戰緊地球上最頂級嘅籃球聯賽NBA，呢件係幾咁難能可貴嘅事，但係「半人半神」Vince Carter做到了，佢將會喺10月征戰自己喺NBA嘅第21個賽季，繼續燃燒自己籃球生涯最後嘅餘光！

運動員生涯有限，要保持狀態繼續打落去好難，而喺世界最頂級嘅聯賽繼續征戰就難上加難，Carter能夠以超過40歲之齡繼續喺呢個全世界只有450位球員可以參加嘅籃球聯賽係非常罕見的，因為除左要保持競技水平之外，身體亦都要保持長期健康。

新球季Carter將會加入鷹隊，預計佢將會肩負作為鷹隊一班年輕球員嘅導師，將佢自己多年嘅經驗分享比呢班新隊友、後生仔，特別係球隊將會重點培訓嘅新秀Trae Young，要知道當年Carter喺1998年選秀嘅時候，Young係仲未出世架。

作為無冠嘅球員，有唔少人都唔明白點解Carter會選擇加盟鷹隊，佢大可以嘗試加盟勇士，咁樣佢將好大機會奪得唔少人渴望已久嘅冠軍指環。不過呢位曾經隔扣無數球員嘅「飛人」，有住自己獨有嘅想法，就係唔會為指環而活，而係為上陣而活。

「我來自一個唔似如今呢個追逐戒指嘅年代，所以，呢種念頭仍然紮根喺我嘅心中，我對於現在嘅方式無任何意見，但呢啲都唔適合我。我加盟鷹隊就係為左打球嘅機會，我仍然對比賽充滿熱情。」

雖然係咁，Carter亦都自己知自己事，明年一月將會42歲嘅佢仍深明自己係時候退落黎:「我認為呢季係我最後一年了，我有90%可能退役。」

每個球員都有退落黎嘅一日，其中有唔少球員我地會為佢拎唔到冠軍指環而感到可惜，不過其實有球員將比賽睇得比指環更重要嘅時候，正係真正彰獻體育精神，「比賽第一，冠軍第二」就係Carter呢位「半人半神」嘅生涯總結。