現年33歲曾效力英超球隊車路士、紐卡素及韋斯咸嘅塞內加爾射手丹巴巴亞，目前正效力中超球隊上海申花。而近日喺一場面對長春亞泰嘅比賽入面，呢位黑人射手就被對方球員激到非常嬲，當中可能涉及種族歧視成份。

就喺申花vs亞泰嘅比賽期間，丹巴巴亞突然非常怒憤，並追住對方中場球員張力黎大聲漫罵，甚至一度捉住對方波衫嘅領位，其他球員見狀都立刻上前阻止雙方有進一步過激行動。

據了解，有指張力比賽期間不斷挑釁丹巴巴亞，甚至喺佢耳邊講出種族歧視嘅說話，好似「You Black」，擺明笑人地嘅膚色。因此，丹巴巴亞難以忍受，所以先有咁大嘅反應。而賽後，申花方面亦對張力嘅行為感到不滿，所以喺社交平台發佈拒絕種族歧視嘅貼文。

2015年離開歐洲轉至中超上海申花嘅丹巴巴亞，2016年不幸喺比賽期間斷腳，其後休養過後好彩無影響到佢嘅職業生涯，2016-17球季一度重新被外借回土超球隊比錫達斯，2017-18球季又踢土超另一支球隊Göztepe S.K.，而黎到今年6月佢又再次回歸申花。

其實整個體壇都嚴勵打擊種族歧視問題，好似NBA就曾經將涉及種族歧視嘅快艇老闆Donald Sterling拉落馬，而今次張力嘅情況，相信並唔會咁簡單就能了事。