| 聽講Dyson又出新吸塵機，你可能問，吸塵啫，使唔L使出咁多款吸塵機呀？Dyson話你知係要嘅，因為每部都會加入啲新技術，今次就玩吸頭！ | ||||||
| ||||||
| 最新呢兩部吸塵機，無線嘅係DC74 Fluffy，有線嘅係DC63。佢哋都包埋班Dyson工程師重新設計嘅專利吸頭，唔再用一條條硬毛組成，改為滾筒式設計，滾筒上面就用軟身尼龍同一排排嘅碳纖維線覆蓋。 你實問咁即係點？我唔直接答你，用例子答你。譬如你屋企塊地同時間有餅乾碎之類嘅大型碎屑，又有正常size嘅細小微塵，以前你要吸兩次，一次吸頭離地少少咁吸大嚿嘢，然後再貼地咁吸細細粒嘅塵；若然一嚟就貼地吸嘅話，只會將餅乾碎推到去唔知邊個死角，之後仲難搞。但係用而家呢個吸頭，就只需貼地吸一次就搞掂，因為大嚿餅乾碎都會俾個滾筒滾住咁吸埋，唔會被推走。 咁樣以後吸塵就唔使烏低身吸兩次，唔止啱晒懶鬼，仲幫到無線DC74 Fluffy慳番啲時間，事關佢嘅電池只夠撐佢個每分鐘110,000轉嘅強力V6數碼摩打20分鐘嘛。 | ||||||
| ||||||
| 至於有線嘅圓筒式吸塵機DC63，仲用埋新改良嘅雙層多圓錐氣旋技術，能夠借助高速離心力，吸走直徑細過頭髮200倍嘅塵蟎、霉菌、花粉等致敏原。（到底乜係塵蟎？上面條片有得睇。）而核心就繼續用番快過F1賽車引擎5倍、每分鐘超過101,000轉嘅V4數碼摩打，但係機身就輕量化咗，只重2.7kg。聽講呢個摩打用咗7年去研發，真係黑洞都夠時間探索呀。 你問點解今次兩部機同之前嗰啲差唔多樣，唔改吓款？正如靚女知道自己個樣睇得，都唔會無啦啦走去整容啦，你話係咪？ 售價： Dyson DC74 Fluffy $6,980 Dyson DC63 Turbinehead PRO $6,980 查詢：2926 2300（捷成消費品） | ||||||
| ||||||
