| 提到「性取向(Sexual Orientation)」，大家最簡單應該會講得出「異性戀」、「同性戀」同「雙性戀」，連埋兩邊都唔鍾意嘅「無性戀」，四者組成最簡單嘅性取向分類，複雜一啲嘅可以計埋「自我性別認同(Gender Identity)」而產生更多類別，但整體黎講都係同「(生理/心理)性別」有關。但近年就有一個同性別完全冇關嘅「性向」出現，而且可能包含咗社會上好一部份人，佢就係「Sapiosexual 智性戀」。 | |
 |
|
| 實際上「智性戀」呢個詞早於九十年代尾就出現，到2014年交友軟件「OkCupid」將其列入可供選擇嘅性取向之一而變得普及，甚至連《Cosmopolitan》、《New York Times》等媒體亦有報導。所謂智性戀，就即係你睇中嘅唔係對方嘅性別，甚至唔係身材外貌，而係智慧，佢充滿學識、哲理嘅思想、談吐比起其他一切更能引起你嘅「性趣」，通俗啲講，你唔係想同佢個人做愛，係想同佢個腦做愛，所以先成為一種「性取向」。而自從「智性戀」一詞變得普及，亦有唔少人認為自己屬於呢種性向，外國甚至有專為屬於呢種性向嘅人服務嘅交友軟體，撮合知性男女們之間的腦漿交流。 | |
 |
|
| 睇到呢到，你係咪覺得有啲奇怪？如果「智性戀」的本質就係「睇中對方嘅智慧」咁簡單——而佢的確係——咁咪即係所有人嘅基本擇偶要求？難道會有人覺得知識越少，與自己越溝通唔到嘅人越性感？冇錯，呢個亦係「智性戀」會飽受批評嘅原因：所謂「以對方智慧為性向」，其實只係一種正常不過嘅擇偶條件，如果當中唔牽涉「性衝動」，就直頭係「做朋友嘅原因」，有人認為其本質就同想搵個 「識打機」、「識背周星馳對白」、「識得睇Game of Thrones」嘅伴侶一樣，百份百合理而正常，但唔能夠稱之為「性取向」。 | |
 |
|
| 亦有人批評人們自稱為「智性戀」，只係想彰顯自己比起其他人更聰明，所以「我唔揀你唔係因為你唔夠高大靚仔、唔夠大波長腿，而係因為你唔夠智慧同讀得唔夠多書」，是虛偽嘅假象。退一步黎講，即使你係想搵個同你有共同興趣，有溝通交流(而非單單體液交流)嘅伴侶，將其推論為「智性戀」亦係變相嘅「階級歧視」。又再者，標榜自己是「智性戀」會為尋找伴侶添上關卡，說明自己「只會」被「有智慧」嘅人交往，只容許與自己相近嘅人而拒絕一切新事物，亦未必係好事。 | |
 |
|
| 簡而言之，以智慧、興趣為擇偶條件，其實並唔係啲咩新奇事，Sapiosexual嘅興起，或者亦代表人們著重溝通而非外表，對於你與我呢一眾外表普通嘅人黎講或者係佳音。但將其稱為你嘅「性取向」，就未必係一件合情合理嘅事。但又有邊個能夠肯定幾年後大家對於「性取向」嘅睇法會唔會同依家有好大出入？話唔定到時你唔覺意再睇到呢篇文，會慨嘆「幾年前啲人原來係咁落後」。 | |