全場比賽

2018-19球季展開左無幾耐，上海大師賽就正式舉行，而目前世界排名第3位嘅「火箭」奧蘇利雲成功打入決賽，對手係成功擊退馬克威廉士及丁俊暉嘅鶴健士。雖然一度落後4:6，但係憑住穩定嘅後勁成功收復失地，最終以11:9反勝對手，成功衛冕賽事冠軍。

今次上海大師賽奪冠，係「火箭」生涯第31個非排名賽嘅冠軍，而佢亦成功拎走賽事20萬英鎊冠軍獎金。

現年42歲嘅雲蘇利雲，可以話越老越可愛，去年狀態可以話達到生涯之巔，竟然單季奪得5個排名賽冠軍，個人生涯則累積奪得33個排名賽冠軍，排名歷史第二，僅次於亨特利。

而黎到新一季，「火箭」嘅狀態明顯未有滑落嘅趨勢，佢先後喺16強、8強及4強分別擊敗羅拔臣、冰咸及威爾遜，最終與鶴健士會師決賽。決賽中，雙方上半場大打對攻戰，而鶴健士嘅表現比「火箭」表現更加好，最終以6:4領先。

不過進入後半場，鶴健士失誤開始增加，「火箭」睇準機會乘勝追擊，成功收修失地，並一口氣反超，最終完成逆轉，並且喺局數10:9領先下，「火箭」更加打出一桿122:0完結比賽。

再一次「火箭」成為賽事冠軍，呢個畫面實在已經見慣見熟，面對住究竟幾時退役嘅問題，「火箭」覺得自己退役之後都無乜其他野做，屆時可能會去參加元老賽，咁樣佢仲算唔算係退役呢？不過，面對住桌球壇仍然被「75三傑」統治，究竟一班年輕球手幾時可以接棒，成為桌球圈嘅話事人呢？