全場比賽精華

尋晚首輪歐聯小組賽繼續進行，其中祖雲達斯作客出戰華倫西亞，而今場同時係C朗拿度首次代表祖記喺歐聯賽事中上陣。可惜嘅係，C朗卻早早喺上半場29分鐘因一個爭議性嘅動作被球證直接紅牌驅逐離場，係其歐聯生涯首度被罰紅牌。

事緣喺比賽第29分鐘祖記一次進攻中，C朗與對方守衛梅里路發生碰撞，後者倒在地上，然後C朗有一個唔知係拍梅里路頭定係抓佢個頭嘅動作，球證見狀吹停比賽並與旁證商議，接著球證竟然直接對C朗出示一面紅牌，將佢驅逐離場！

對於球證嘅判罰，C朗完全接收唔到，可以見到佢差唔多喊咁嘅面口，並訓左喺地不斷拍打地面。隊友們見狀都過黎安慰C朗，並將佢拉番起身，最終C朗亦只能無奈走回更衣室，而佢一度伏喺球員通道口前，明顯仍然未能夠接受自己被紅牌逐出場。

原來今次被罰紅牌，係C朗歐聯生涯第一面紅牌，要知道佢生涯已經參加左154場歐聯賽事，首度染紅確實係令人驚訝的。對於球證嘅判決，有唔少球評都認為處罰過嚴，最多都應該只係一面黃牌而已。

更令祖記上下擔心嘅係，歐洲足協好似覺得C朗嘅動作係嚴重違紀行為，故有意追加對C朗嘅處罰，呢個講緊可能係3-4嘅追加停賽。不過，雖然與華倫西亞嘅比賽早早無左C朗，但係強大嘅祖雲達斯仍然憑住兩個12碼成功2:0擊敗對手。