近日幾乎全部日本繪師都畫緊一個新嘅二創角色「庫巴公主」，隨便碌一碌Twitter，不同嘅「庫巴公主」都會湧現眼前，奇怪嘅係呢個「庫巴公主」又唔係官方所創嘅新角色，到底邊個發起令一眾繪師都跟風咁畫呢個「庫巴公主」呢？家下就話過你知呢個「庫巴公主」爆紅嘅起源啦！

先同大家介紹一下「庫巴」（日語：クッパ，英語：Bowser或Koopa King），別稱大魔王（日語：大魔王クッパ，英語：King Bowser Koopa），佢係日本遊戲設計師宮本茂設計嘅一個虛構遊戲人物，亦係Mario遊戲裡面嘅大奸角。而「庫巴公主」嘅出現，全因為任天堂新作嘅宣傳影片，大約十幾日前，任天堂公佈Switch新Mario遊戲《New超級瑪利歐兄弟U豪華版》（New Super Mario Bros. U Deluxe）嘅影片，當中追加咗新系統同埋新角色，而其中一位新角色「奇諾比珂」（キノピコ/Toadette），只要喺關卡中得到「Super crown」，就可以變身成為十足Peach公主一樣嘅「Peachette」。

於是有一位馬來西亞同人畫師「haniwa」見到Peachette後，就嘗試將「戴上王冠變公主」呢個設定套用喺庫巴身上，畫咗庫巴女體化變成庫巴公主嘅四格同人漫畫。

估唔到呢個漫畫會喺日本Twitter上爆紅，仲立刻引爆話題，結果一班日本繪師都紛紛追上潮流，畫出「庫巴公主」（クッパ姫）二次創作。一齊睇睇不同嘅「庫巴公主」啦！