昔日嘅天才哥爾夫球少年老虎活士，轉眼間今年已經42歲，人生經歷左大起大跌，如今嘅佢可以話已經係看透世事，繼續比賽只係為左證明自己，佢仍然係個一位哥爾夫「天才」。

相隔5年無冠，已經係一名「大叔」嘅活士較早前再次奪得巡迴錦標賽冠軍，上演了一次真人版「逆流大叔」，喺5000萬人見證下再一次展示其久違了嘅壓倒性實力。

順利奪冠後，活士亦迎來生涯第8次代表美國隊出戰兩年一度嘅萊德盃歐美隊際高爾夫球賽，不過作為70後兼前輩嘅佢，竟然被同為隊友嘅新生代球員Justin Thomas嘲笑一個唔少大叔都有嘅煩惱，就係頭上已經無乜毛髮了。

喺美國隊最後一次練習期間，活士面對Thomas嘅取笑，唔單只無嬲，仲以笑看風雲嘅姿態拎左一塊草皮放喺自己頭上「戴綠草」進行自嘲，完全唔介意自己嘅形象，實在令人非常佩服。

作為歷史最偉大嘅哥爾夫球手之一，如今嘅活士看似已經睇化晒，佢更多嘅係享受比賽，而以更輕鬆嘅心態去比賽可能令佢更加得心應手，就好似其他體育項目嘅頂級老將: 費達拿、奧蘇利雲等，繼續展現自己嘅統治級實力！