施丹出走皇馬已經超過4個月，而皇馬唔單只失去施丹，更將C朗拿度賣至祖雲達斯，令呢支歐聯三連霸戰力受損，目前喺聯賽竟然只排在第4位，並有多場未能取得入球，情況令人擔心。

作為施丹的繼任者，新領隊盧比迪古執教能力開始受到質疑，多位球員亦開始對呢位教練失去信心，相信如果盧比迪古唔能夠為球隊挽回頹勢，佢將有機會好快被辭退。

如今睇番當日施丹離開皇馬嘅情況，消息一出可以話震驚整個球壇，因為呢位法國教頭兼名宿離任只係距離皇馬連續第三年奪得歐聯冠軍不足一個星期，實在係出乎意料。

咁究竟係咩原因令施丹離開呢？最明顯嘅就係佢同皇馬主席佩雷斯嘅意見不合，其中有指施丹非常想引入車路士球星夏薩特，但佩雷斯並未同意，反而佢只係一心想引入曼聯門將迪基亞。另外，亦有指施丹想賣走巴利，佩雷斯雖然已經首肯，但一直未有加大力度完成交易。

不過，有傳施丹離隊真正嘅起源，其實就係黎自巴利喺歐聯決賽上嘅倒掛金球。此話何解呢？原來本身已經同意出售巴利嘅佩雷斯，見到巴利攻入呢球倒掛之後，再一次反口唔想出售巴利，甚至向施丹表態認為巴利比C朗拿度更出色，作為領隊嘅佢理應再諗諗佢喺皇馬嘅未來。

雖然巴利為皇馬喺歐聯決賽攻入兩球，但施丹並未有改變自己嘅想法，佢只想得到沙拿、夏薩特或哈利簡尼。最終，施丹同佩雷斯喺歐聯決賽後正式決裂，施丹只係拋低一句：「我完成任務了，你黎照顧球隊吧！」