NBA近年不時會出現嚴重嘅受傷情況，其中最深入球迷心嘅相信一定係前MVP Derrick Rose嘅受傷，因為佢唔係一次，而係兩次出現毀滅性嘅重傷，如今能夠繼續喺NBA征戰已經算得上係奇蹟。

而今日籃網分衛Caris LeVert喺面對木狼嘅比賽中，一次封阻落地不幸受傷，右腿嚴重變形，痛苦不堪，一眾隊友見狀都不得不掩面，甚至有球員更當場喊起上黎，可見今次LeVert嘅受傷有幾嚴重。

今次LeVert嘅受傷，有一位球員可以話相當特別，佢就係Derrick Rose啦。唔係話佢都曾經出現過嚴重嘅受傷，而係佢曾經現場見證近年3位不同球員出現相似嘅嚴重傷患。

除左今次LeVert外，Rose亦都曾經現場見證Paul George及Gordon Hayward兩次大傷，其中喺2014年美國隊隊內比賽期間，Rose就見證PG落地斷腳，之後2017年揭幕戰騎士vs塞爾特人，當時岩岩加入騎士嘅Rose又見證Hayward落地腳踝折斷。

面對三位球員嘅受傷，相信Rose一定感同身受，甚至可以話係最明白佢地情況及感受嘅球員。對於LeVert嘅受傷，Rose表示自己會不斷為對方祈禱，但呢種事情總係令到佢自己思緒混亂。

今季，Rose喺木狼可以話迎來重生，如今出戰13場，場均交出19.2分4.8助攻3.5籃板，其中得分係自2011-12球季以來最高的，並且較早前更取得生涯最高的50分，寫下個人里程碑。對於唔少球迷黎講，Rose已經無可能再變回當日個位MVP，能夠繼續見到佢比賽已經心滿意足，不過對於Rose黎講，繼續突破自己，打出自己最好嘅籃球就係佢而家最想做的事了！