這套電影投資22萬港幣，單計日本票房已收1900萬以上，未計全球評論一片向好各地爭相公映，實在是平凡人的神一般的熱血故事。作為編劇和導演的上田慎一郎自然最飲得杯落，但係佢一鋪成名飛黃騰達之先，其實佢生活非常唔掂，欠下大量卡數，打工又被人詐騙，窮到一個人要住公園做流浪漢，人到34歲依然一事無成，佢的電影履歷只係拍過8部短片同作為新導演一部完全無票房的長片，拍電影當然只能算得上是興趣。就係咁神奇的經歷一次用心製作的佳作為佢帶來一鋪成名同座地粒六2000萬港元的進帳。這才是人生的故事。

電影中扮野導演的男主角濱津隆成為另一位人氣急升的奇蹟演員，故事依然同上，接拍屍殺片場時，佢係零片酬接拍，純淨過下戲癮，相信無唸過能夠一殺成名。濱津隆大學畢業一路二打六做下搞笑藝人，拍戲跟本就無法維持生計，拍攝屍片時佢正係情侶時鐘酒店度任職做執房清潔男，最慘的係睇住人人來開房自己窮到10年無拍過拖。《屍殺》大奇蹟為佢帶來人氣急升，電影、日劇、廣告等邀約不斷，電視劇《金裝律師》；電影《《魔法少年：Wild Virgin》等等大量工作機會出現，所謂今時唔同往日，終於捱出頭來。人生就是等待一個機遇，今日唔知聽日事。

女主角秋山ゆずき，早排我地Menclub同事都有介紹過佢過去性感的一面，故事的情節一如所料，一個完全無起色的女優，打入日本藝能界十年，期間唔整容唔隆胸(可能窮到無錢整)，無人事關系，想靠實力上位，難過登天，撈到盡先剛剛成功加入一個日本女團組合「EVERYDAYS」做其中一團員。根據佢過去拍過的性感DVD同寫真，再唸返日韓演藝界的潛規則，秋山咁多年來受過的苦練，又有幾多人懂得，如今一拍成名天下知，初出道的寫真比人炒賣炒貴十倍。人紅出演的機會也多,秋山ゆずき係日本已人氣急升，一砲而紅。

一套神劇，帶起左一班《屍殺片場》的台前幕後，本年度又或者本世紀其中一個電影大奇蹟一定係《屍殺片場》。未睇？我無興趣叫你睇喎。識欣賞的駛咩推廣..........我只想大家一起睇下呢個電影夢...........原來夢想同追夢真係有得搞！定只是日本人特別熱血才可以？！