較早前一場國際友誼賽，阿根廷以2:0擊敗墨西哥，其中兩名射手伊卡迪及戴巴拿各自攻入自己喺國家隊嘅處子球，而呢個結果亦再令球迷質疑，為何當日世界盃兩位射手竟然沒有機會上陣，如果唔係美斯喺場上就唔會咁孤立無援。

今場係阿根廷4天之內第二次面對墨西哥，上仗憑住後衛富尼斯摩利嘅頭搥及對方擺烏龍以2:0取勝，而今場球隊終於憑住射手攻破對手大門而取勝。

早喺開賽兩分鐘，伊卡迪喺對方禁區精彩嘅憑住出色嘅身體質素避開防守球員，繼而左腳射遠處網仔破門。呢個入球充分表現伊卡迪嘅埋門觸角，呢種正箭頭就係阿根廷喺今年世界盃所欠缺的。

下半場81分鐘，戴巴拿後備入替伊卡迪，而呢位祖雲達斯射手亦成功把握咁短嘅機會，喺81分鐘突入禁區，接應隊友地波傳中順勢起腳破網。憑住呢個入球，阿根廷成功鎖定勝利。

睇見呢場比賽之後，可以說明阿根廷隊就算無美斯實力其實都係非常強，特別係用人得宜之下，佢地仍然擁有非常出色嘅射手為球隊攻堅。如果世界盃當日阿根廷隊願意派有伊卡迪或戴巴拿上陣，咁樣美斯場上就有多一位得分幫手，對方亦唔會只係花心力去mark死美斯一人了。

未來如果呢支阿根廷隊可以踢出新氣象，其後美斯歸隊之後阿根廷有望實力更進一步，但當然球隊絕對唔可以只依賴美斯一人，一定要對其他球員都報以信心一票先可以令球隊變得更強大。