| 三叔S5開賣價$5,998，現時定價$4,498。 三叔Note 4開賣價$6,298，現時定價$6,298。 三叔Note Edge開賣價$7,498，現時定價$7,498。 睇完呢堆數字，我以為三叔唔會再出平機，但原來仲有嘅，聽日就正式賣街，就係呢兩部GALAXY A5同A3。 | |||
| |||
| 幾錢？ $3,298同$2,498！睇完請唔好好似賭聖叫「三叔」後吳孟達咁嘅反應，我知大把差唔多spec.嘅機只係千零二千蚊，但人哋係堂堂三叔喎，點可以同其他牌子比呢？同番自己啲S5、Note4、Note Edge比，係咪叫平先！ | |||
| |||
| 兩部機相差8嚿水，差啲乜？ 1. 貴啲嘅A5個芒有5吋同去到720p解像度，A3個芒就只有4.5吋同停留喺標清級數嘅960x540 。 2. A5個機背鏡頭有1,300萬像素，A3就只有800萬像素。 3. A5有2GB RAM同16GB ROM，A3就只有1GB RAM同8GB ROM。 4. A5機身薄啲，只厚6.7mm，A3就厚少少，有6.9mm。 不過，大芒A5嘅面積一定大過A3，同埋兩部機都係用同一粒四核心1.2GHz CPU。 | |||
兩機真實面積差距
| |||
| 兩部機sell乜？ 其實平機嚟講，呢個問題真係好難答你。三叔自己就話sell佢哋個前置鏡頭，因為有500萬像素又有106度廣角，自拍特別正喎。Well，Gentleman，唔知你哋啱唔啱使喇，唔啱可以當我冇講過。 | |||
| |||
| 兼容5模17頻 我個人就覺得佢哋兼容晒中港兩地嘅4G同3G網絡（5模17頻），呢點應該啱更多Gentleman用。 特別的雙SIM槽 同埋佢哋都係雙卡雙待機，不過兩條SIM槽嘅設計幾特別。第一條係正常插nano SIM嘅槽，第二條就係nano SIM同microSD卡共用嘅卡槽，即係話Gentleman唔上大陸、唔插兩張SIM卡嘅時候，就可以用SIM 2槽嚟插記憶卡。但當然，調番轉講即係要插晒兩張SIM嗰陣，就冇得用microSD卡啦。 | |||
| |||
| 紮實金屬邊框 其實兩部機嘅機身構造都值得一讚嘅，因為係用一體成形機身，再加條比Note 4嗰條更紮實嘅金屬邊框，手感唔錯，只係有少少刮手啫。話明一體成形，即係背蓋冇得打開啦，可能因為呢個原因，雖然兩部機都係用膠蓋，但膠感就冇其他三叔機咁重。 一句到尾，兩部機主要就係sell佢哋係堂堂三叔嘅平機，用唔用，你諗你。 | |||
| |||
| Samsung GALAXY A5規格 售價：$3,298 系統：Android 4.4 制式：FDD LTE、TD LTE、WCDMA、TD-SCDMA、GSM（SIM 1）/GSM（SIM 2） 屏幕：5" 1,280x720 Super AMOLED 處理器：四核心1.2GHz 記憶體：2GB RAM 鏡頭：1,300萬像素（後置）、500萬像素（前置） 儲存空間：內置16GB、microSDXC（最高支援64GB） 電池：2,300mAh 體積：139.3x69.7x6.7mm 重量：123g 顏色：白/黑/金（黑及金色版稍後推出） Samsung GALAXY A3規格 售價：$2,498 系統：Android 4.4 制式：FDD LTE、TD LTE、WCDMA、TD-SCDMA、GSM（SIM 1）/GSM（SIM 2） 屏幕：4.5" 960x540 Super AMOLED 處理器：四核心1.2GHz 記憶體：1GB RAM 鏡頭：800萬像素（後置）、500萬像素（前置） 儲存空間：內置8GB、microSDXC（最高支援64GB） 電池：1,900mAh 體積：129.8x65.8x6.9mm 重量：100g 顏色：白/黑（黑色版稍後推出） 查詢：Samsung 3698 4698 | |||
