如果單憑外貌推測，Zelia Zhong（鍾浠文）擁有一副與「千憶新抱」徐子淇八九成似的外貌，加埋傳統美女必備的白晢皮膚、紅唇兼齒白又身型高佻，身邊要有一百幾十個觀音兵追隨者實在毫無難度，但Zelia以她的半鹹半淡的即時大笑︰「我真係無乜人追呀！都唔知係唔係我個樣已經寫住咗已婚定已有男朋友！」跟住佢又是哈哈大笑。
Zelia是正宗外柔內剛人版，外表一副女神相，內裡則是男仔頭盡現。鏡頭前，她穿上又粉紅又白的小背心長裙，表現是如何地儀態萬千滲出氣質；鏡頭後，即時穿上全黑皮裙皮褸皮靴，紮起高髻架起眼鏡，剛才長髮飄飄的美女即時不知所蹤。
「我個樣望三分鐘仲可以散騙到人，以為呢個女仔好溫柔，但坐多五分鐘個本性就出晒嚟，講嘢喂前喂後，最後身邊啲男仔都會覺得同我做兄弟好過。」貨不對辦這四個字，是曾經追她的或交往過的男生給予Zelia的最多評價。
從另外一個角度看，Zelia其實份人都幾保護自己，可能身為獨女，父母又長期不在自己身邊，性格又比較孤僻，外型又嬌柔弱質纖纖，沒人保護，就唯有靠自己，以上所提到的粗粗魯魯，鐘意著黑皮褸鉚釘，都是只是刺蝟表現的反映︰「可能媽咪女強人的性格遺傳咗俾我，而我本身又係山羊座，又保守又固執，好有自己一套，所以性格自自然然變到咁。」
提到父母，Zelia特別地要多謝媽咪，她形容媽咪是一個好現代的人，成日覺得她是從外國回流的，因為思想非常開明，從來無阻止自己做任何事，無論是找工作、找男友或者全世界都覺得不太看好的事，媽咪都不會阻止，因為佢覺得Zelia仲後生，跌低後仲有時間爬起身。這類型的媽咪，在港孩當道的香港應該買少見少。
Zelia除了有翻版徐子淇之稱外，還有一個「鬼姐」的稱號，我還以為是用來形容她生得鬼火咁靚，原來非也「應該係六年前，我同栢豪去睇戲，睇完之後佢係(車立)到影咗張相，張相入張佢就影得自己好清楚，但我就被佢影到朦朦哋又頭髮摭面，之後佢就將張相post係微博到仲話(車立)有女鬼，跟住無幾耐粉絲就鬼小姐咁叫我，久而久之仲變咗叫鬼姐，而家大家見到我都唔叫Zelia，全部都叫我鬼姐，哈哈哈，我覺得咁樣叫仲親切。」
數一數手指，Zelia冠上「翻版徐子淇」這個光環都用了六年，是時候找回一個屬於自己的名號，「鬼姐」之稱，正好適合Zelia如此飄忽的性格。除了名字，也要嘗試尋找一條比模特兒之路走得更遠更長的職業︰「除了前兩年嘗試開cafe之外，下年就想籌備開一個攝影展，題目大致是《我眼中的人》。因為我覺得攝影是另一種藝術的創造，我會係屋企set燈反光板腳架自拍，每次都有唔同主題，例如會睇一套電影，播一首音樂，營造唔同的感情表達。」
更多獨家靚相請留意MENCLUB instagram Photo:Mann |
