| 都知道百度唔會甘心只做搜尋器㗎喇，人哋Google又出手機又出Google Glass，雖然佢未有咁犀利，但都同清華大學合作，開發咗呢架智能單車DuBike！ | |
| |
| 呢架DuBike，就好似將而家最興嘅穿戴式智能裝置功能，擺晒入去架車裏面咁。例如佢有智能手錶嗰堆健康管理功能，即係偵測用家心率、 踩車之類，收集完啲資料就會經藍牙傳送去手機畀用家睇番，從而等用家知道運動成果同訓練效能，似足戴智能錶練跑咁。 不過，佢最叻其實係內置GPS，識自動一邊行車一邊導航，靠嘅就係把手位上面嘅LED指示燈，每逢踩到分岔路，佢就識着燈話用家知應該行邊面，唔使再夾住部手機喺把手，方便得嚟又可以為手機慳電。 仲有，GPS系統仲可以提供防盜功能，萬一你部DuBike俾人偷咗，都能夠透過手機追縱佢俾人踩咗去邊，跟住報警拉人起車，幾似Find My iPhone，唯獨係冇得鎖車唔俾個笨賊踩啫。 | |
| |
| 咁多智能裝備，架車仲配備埋前後車燈，你問使唔使叉電？答案係唔使嘅！因為架車本身已經有動能轉化電能嘅系統，只要你keep住踩，佢就會keep住有電，長期戰OK！但計我話架車最正係設計得幾型，冇乜強國味，下年初上市嗰陣值得諗諗。 | |
| |
