| 現時無論去到乜乜乜景點，抑或簡簡單單食餐飯，都總會見到有人拎碌自拍神棍出嚟自拍。其實講到底，唔怕麻煩帶碌神棍出街，無非都係想啲自拍相靚啲啫。 之但係，而家已經去到動新聞年代，好多嘢淨係得張相，係唔夠交待嘅，最好始終係拍埋片。想啲手機片都拍得有水準啲，一樣可以用呢碌進階版自拍神棍HUSKY HY2幫幫手，出到嚟段片冇咁震，睇嘅人就唔會以為你隻右（或左）手搞乜搞到震晒啦！ | |
| |
| 穩定手機拍攝 雖然叫HUSKY HY2做進階版自拍神棍，但只係夾部手機呢吓似啫，其實佢冇得拉長，用途亦唔只得自拍。佢個學名係叫兩軸電子手持雲台，即係類似睇電影making of成日見啲cam man handheld拍攝時、用嚟穩定部攝影機嘅裝置，只不過佢係專畀手機用嘅縮水入門版。 點解要用佢？因為無論而家啲手機嘅影像穩定系統有幾勁，徒手揸住部機拍片，就算只係好普通咁pan吓鏡，或者追住目標嚟拍，出到嚟段片都難免會震，點都要有外在嘅穩定裝置輔助。 | |
| |
| 內置兩軸摩打 HUSKY HY2嘅兩軸，係指佢有兩個內置摩打去保持手機穩定同平衡，拍片時有佢哋緩衝震動，手機鏡頭就冇咁多高低起伏，畫面定好多，唔會睇到頭暈。而嗰兩個摩打，仲分別負責手機360度旋轉，以及大約90度傾前同仰後，即係無論你想用咩角度取景、高炒抑或低炒 ，HUSKY HY2都同樣辦得到，唔使就住就住。 | |
| |
| 筆者嘗試搵人喺公園尾行個女仔嚟測試HUSKY HY2嘅性能，徒手揸手機嗰陣，就算佢唔算行得好快，我只係慢慢行跟住佢，拍出嚟都一樣明顯見到畫面好震。但當裝咗HUSKY HY2再試，唔止慢行時畫面定好多，即使個女仔開始急步走，畫面嘅穩定性仍然可以接受；跟住再一邊行一邊舉高放低HUSKY HY2去高低炒，過程依然算定。 | |
| |
| 大塊手機、卡片DC都夾到 咁乜機用到HUSKY HY2？佢個手機夾都拉到幾長吓，大塊到連5.5吋嘅iPhone 6 Plus都夾到，一般細啲嘅手機都梗係得啦，仲有連GoPro action cam，或者比較薄身嘅DC仔都夾到。而且手機夾加上咗安全鎖，唔會好似啲自拍神棍咁成日跌部手機落嚟，放心！ | |
| |
| 講到價錢，盛惠$2,580。呢個價，確實比較少人會買嚟平時得閒無事玩。不過，外國已經有唔少專業導演直頭用iPhone嚟拍MV，甚至拍戲，例如奧斯卡最佳紀錄片《尋找隱世巨聲（Searching for Sugar Man）》，證明手機拍片一樣上得大枱，有需要拍專業少少嘅手機片的話，真係值得投資。 | |
| HUSKY HY2規格 售價：$2,580 負載重量：110-210g 電池容量：500mAh 尺寸：145x163x255mm 重量：410g 查詢：OnTheGo 3589 4189 | |
