之前MenClub介紹過BANDAI推出咗「忠實呈現腳臭氣味」嘅野原廣志模型，估唔到BANDAI咁快又有新作，今次都係同《蠟筆小新》有關，就係小新心愛嘅玩具——「光屁屁怪獸」！

有睇開《蠟筆小新》應該多少都會對呢個「光屁屁怪獸」玩具有啲印象，佢係小新心愛嘅玩具之一，話說佢原本係一隻正正常常嘅怪獸玩具，但有一日，小新唔小心整唔見怪獸條尾嘅配件，搞到怪獸屎忽得返個窿，於是小新就隨便搵咗個屁股零件安裝落去，結果佢就成為「光屁屁怪獸」！

而最近BANDAI就忠實還原呢個玩具，仲將佢商品化添！「光屁屁怪獸」唔單只頭部同手腳可以轉動，就連屁股都同動畫一樣，可以拆出黎玩！

「光屁屁怪獸」（怪獣シリマルダシ）參考售價大約2,400円（含稅），預定2019年9月30日發售，有冇巴打都想要返個玩下呢！