阿根廷球王馬勒當拿，球員生涯可以話係呼風喚雨，其中佢喺1986年帶領阿根廷奪得世界盃係佢生涯巔峰，因此即使掛靴後佢仍然係阿根廷人嘅國民偶像，甚至有球迷當佢「神」咁拜，可以想像究竟佢對阿根廷人係有幾重要。

而喺1982年當時仍然效力阿根廷球隊小保加嘅馬勒當拿被巴塞隆拿睇中，希望將佢帶到西班牙，但係你估阿根廷當地嘅球迷又肯唔肯過你呢？

當時巴塞隆拿嘅副主席Joan Gaspart透露，當年將馬勒當拿送到機場，竟然需要動用坦克去護送！！

Gaspart表示：「我記得當時我地去機場係坐坦克的，因為當時警方話比我地知，我地由酒店去機場嘅路入面好大機會受到攻擊。對於將馬勒當拿帶離阿根廷，呢個決定就好似對小保加嘅球迷作出重要嘅攻擊一樣。」

因此，Gaspart與馬勒當拿就離開酒店坐上坦克，一路由坦克護送到機場，期間坦克兩旁都有唔少車及電單車跟住，最終直到佢地成功上到飛機，球迷們先放棄。

當年，巴塞以500萬鎊轉會費成功簽下馬勒當拿，當時黎講已經刷新世界最高轉會費紀錄，但短短效力兩季，馬勒當拿就離開巴塞轉投拿坡里了。