《Witcher》男星Henry Cavill早前接受訪問時指自己家裏沒有「Man Cave」，主要原因是因為佢喺倫敦間屋根本就冇多餘空間。呢個理由對於身在香港嘅我哋可以話係感同身受。當你間屋連傢私都唔太放得落，仲想擁有一個屬於自己嘅空間就實在太過奢侈。

但除咗土地問題，外國網站《Men's Health》就提出另一個「男人不應擁有Man Cave嘅理由」。佢指家裏設立Man Cave，就同以前嘅人喺屋企會有個書房供男士辦工、見客一樣，係為咗畀個空間男人「做自己該做嘅事」，換言之房外面嘅嘢如家務、湊仔、甚至買日常用品等事項，就係「男人唔該理嘅事」，咁呢啲事係邊個理？好自然就係由家中嘅女士們去處理。

問題係現代男女觀念、社會結構已經與幾十年前非常唔同，家務、育兒不再只係女士們嘅責任，現代男性亦要幫忙分擔。換言之，男性已經唔可以匿喺間房到「避世」，必須從Man Cave中走出來，與女伴一齊承擔家庭責任。