世界上最應該減薪的制服團隊，蝦完人仲可以光明正大加薪；世界上最應該加薪的制服團隊，救完人卻要被逐一清算。聽落咁仲成世界既，嗱，呢個就係我哋身處既世界。而球場上，當祖雲達斯球星少收4個月人工、巴塞隆拿球星大刀闊斧減薪7成之時，中超暴發戶目前仍是印印腳等過數，圈內反對減薪的聲音此起彼落。

武肺病毒輸出國，原定於2月下旬揭開新一季中超，隨後受到疫情波及延期到4月，但目前看來，復賽未見一絲曙光。Sporting Intelligence資料顯示，中超球員平均年薪達105萬美元，即超過720萬人民幣，排在全世界第6位。換句話說，除了歐洲五大聯賽之外，收入最高的就是中超。之不過，中超球員，特別是強國土炮，表現強薪低能，路人皆知，連小粉紅群族也懶得為他們發聲，多年來被視為「民族笑話」，恥與為伍。君不見今次武肺疫情之下，出錢出力的足球員寥寥無幾，對金錢的吸力比黑洞更厲害。

未知是否代人發聲，武漢卓爾老將艾志波就發長文解釋反對減薪的理由，其中一段提到：「歐洲球隊減的根源是球員都放假了，回家了，沒有訓練，就在家等同於停工休息。但是國內的大多數球隊除了疫情嚴重時有過短暫的放假外（不讓回家），幾乎都是沒有回家休息和家人在一起，大部分時間還是在正常訓練準備冬訓。」總結全文，中超各隊仍在集訓，中國球員沒有臨時失業保障，以及中超經營模式難同歐洲相比。

講出來似是大條道理，問題是，全球經濟受到打擊，唔可能有老闆笑得出。今日，中超班費成本貴到無朋友，基本上是5億人仔起跳，8億人仔都未必殺得前列，上季只花3億的球隊就刷新史上最低分降班紀錄。況且，英超已在討論集體減薪，中超未計豐厚比賽獎金和大量陰陽合同，頂薪土炮的年薪仍達1200萬人仔，就算只是減薪3成，依然能夠大魚大肉夜蒲淫慾。

百業蕭條，中超球星又何顏面繼續收取高薪糧餉？中甲中乙在疫情爆發前已踏入寒冬，多隊拖糧3個月以上，四川和遼寧新球季唔玩中甲，深圳佳兆業或要被「強力」升回中超，同時蘇州、江西、崑山等6隊被邀請報名繼續玩中乙...難怪有內地班主自嘲，足球班主群組近半年來靜蠅蠅，原來很多乜總物總早已「退群」。

共步時艱呢個句，只能用「畀啲掙扎」來回應。老闆要打工仔減薪，唔該管理層齊齊減，唔係獎金照袋，愈袋愈大袋，更莫論某地特首敢在此時此刻宣佈加薪。你睇，唔算高薪的多蒙特CEO都自願在停擺期間減薪30%，南韓足總高層亦自動減薪2成到年底，即講即做，有番兩度。

嬲一陣好了，唔好谷壞自己，可能加人工佢都唔想，只係加入政府咁耐已經唔識say no，以為全港打工仔都搵十萬八千七。「有些人看起來像個白痴，講話也似個白痴，但千萬別被騙了，他們真是個白痴。」美國喜劇演員Groucho Marx活在黑白世界時，已看破彩色的人間。