今季英超喺利物浦大幅領先下，突然因為疫情爆發而被迫暫停，相信令不少球迷非常失望。而近期疫情終於得到緩和，而英超賽會亦希望可以喺6月中開始閉門復賽。

而為左能夠順利復賽，英超早前斥資400萬鎊與香港基因檢測及數碼保健公司Prenetics合作，參與其「Project Screen by Circle」計劃，為各支英超球隊嘅職球員供應檢測套裝與防護設備、實驗分析、直通檢測站、結果呈報等一系列服務。

今季英超仲有92場賽事未踢，而若果賽會真係決定復賽，將要求Prenetics每周兩次為球員及職員進行病毒檢測，預計整個項目嘅檢測量將會超過40,000宗測試。球員可於一個工作天內取得檢測結果。如果有球員檢測呈陽性反應，無論出現病徵與否，都會停止參加球隊訓練及比賽，並接受14天自我隔離，至於該名球員嘅其他隊友則無需接受隔離。 

預計今次合作，將可以確保英超能夠順利復賽，屆時一眾球員終於唔使再餓波啦！