有一個挪威嘅音響品牌自從我投入音響發燒以來一直都好喜歡，因為佢地相當老土唔識花巧，產品外型五十年如一日，完全唔會考慮有新變化，不過價格平實聲音敦厚溫暖高貴，作為音響發燒友用耳仔選機非常正路，佢名字叫Electrocompaniet，十年前佢地推出左全新二聲道合併機，一轉眼又十年佢地又好低調地重新發佈全平衡合併式擴音機ECI 6 MKII加上串流一體版本ECI 6 DX MKII，好有趣部機依然都係咁嘅樣由1973年到今日設計外觀不變，咁樣反而引起我興趣，同年年出新機的品牌比較，Electrocompaniet一部起碼玩到十年，主要睇你有幾多個十年，這就是老品牌的魅力。

2010年挪威Electrocompaniet推出全新合併機ECI 5 MkII，當時佢用料同機內設計同過去的舊款完全唔同，可謂適應全新21世紀，佢地設計非常全面週到，一用何止十年，全新2020年推出ECI 6 DX MKII模擬放大等部份完全一樣，每聲道4粒功率晶體推動配上80,000μF優質電容量。幾十年來EC都係用其招牌「FTT」浮動變壓器技術（Floating Transformer Technology），令到電源變壓器面對不同頻率的訊號時，能夠維持相同阻抗，進而使電源供應線路具有更高的電流容量，做到推動力強從容不逼。今次新型號配備咗更好嘅電源線路同更先進的 前級放大模組，當然仲有為咗適應數碼新時代特別設計嘅 數碼串流模組及解碼。新機有兩個型號，如果你已經具有數碼播放器或訊源，單純想搵一部好的合併機，ECI 6 MKII就提供到可靠的選擇，佢係一部相當可靠出色推動力強勁的合併機供應125W×2（8Ω負載）的輸出功率，理論上一般的喇叭都絕對可以推動。聲音一如旗下經典，相當溫暖敦厚音樂感豐富耐聽自然， 我相信全新型號聲音都係一如既往， 呢個品牌一日存在都應該係保持住呢一種標誌式嘅聲音。

至於新型號一體化的ECI 6 DX MKII相當非常適合從零開始的音樂發燒友，因為佢有串流模組，可以Wifi接收串流播放，也可以USB輸入，內置解碼，並可以iOS或Android設備有品牌專用APPS進行控制。可連接的USB位有兩個一個可以輸入訊源，一個可以連接Hard disk 。實際上只要一部機就可以成為一套全新音響，買對喇叭基本上可以開聲，非常簡單方便，合符今時今日的簡約音響需求。

仲有人會拘泥於新舊型號到底有乜嘢唔同首先第一當舊型號推出之後舊型號就買唔到， 第二根據原廠表新機型輸出級以適度的負反饋進行，因而獲得了更好的低頻擴展和控制能力，擁有細緻和開放的中音以及溫暖細膩的高頻。廠方仲係網絡介紹中指出佢地重新設計左新的前面板(係一樣不過顯示數碼化咗)，機身結構也得到了強化，所以更加堅固。 呢種種變化根據原廠提到佢嘅聲音係會比舊款動態嚟得更多更大更闊驅動能力亦都更高，可以有更強控制力。成日有人問買邊部合併機比較好，其實我向來推薦Electrocompaniet，如果你單純愛音樂，唔追外觀唔年年換機，呢部應可以滿足你未來十年需要，十年後睇下佢又出咩新型號。