早年久石讓訪港，相信大家都試過搶飛，而大多數人都係搶唔到。但今年12月你又有多次機會啦，因為今年七十大壽嘅久石讓會再次來港，與「香港管弦樂團」合作兩組共四場演出！

是次演出題為「亞洲萬里通榮譽呈獻：久石讓音樂會」，定於12月4-6日舉行，久石讓會帶領港樂演奏《Woman》、《魔女宅急便》組曲等名作，更會首次演出《第二交響曲》及《圓號協奏曲》兩首曲目，後者更請黎日本圓號演奏家福川伸陽(Nobuaki Fukukawa)、港樂首席圓號江藺及聯合首席圓號柏如瑟(Russell Bonifede)合奏。

值得留意嘅係演出曲目會隨場次而有所不同，《Woman》及《魔女宅急便》組曲係四場都有，但《第二交響樂》則只會於4號晚及5號下午場演出；5號晚同6號下晝場就會換成《遇見》弦樂版及《圓號協奏曲》。

演出門票只接受網上實名訂購，優先預訂詳情會於6月22日在港樂網站公佈，但睇個演出名都估到邊張信用卡有得優先訂啦。公開發售詳情就去到10月中先公佈，大家留意港樂同城市電腦售票網啦。