相信大家都已經習慣哂上網打機——唔係講緊Online Game咁簡單，而係近年大家打咩Game都可以上網同人連線，係就係方便咗嘅，但以前打《Winning》都要去朋友屋企，依家就自己一個喺房戴住Headphone，硬係冇咁好Feel。

而其實唔單單係情懷問題，根據日本職業《鐵拳》選手Chikurin，連線打機嘅普及，甚至會影響電競選手嘅實力！

右邊就係Arslan Ash

本名嵩裕太嘅Chikurin早前接受日本NHK節目《逆転人生》嘅貼身追訪，咁話到明「逆転」就即係佢曾經有低潮啦。卻說上年2月一年一度格鬥界盛事《EVO》於日本舉行，於日本《鐵拳》中享負盛名嘅Chikurin雖然成功打入8強，但半準決賽就出局，反觀名不經傳嘅巴基斯坦選手「Arslan Ash」就一路遇神殺神最終奪冠，奪冠後Arslan Ash接受訪問時更指「像我這個水平的選手巴基斯坦到處都是。」而又由於Arslan Ash實力堅強令人輸得心服口服，Chikurin就決定親身去到巴基斯坦，睇下究竟巴勒斯坦嘅《鐵拳》界究竟係咩一回事。

去到先發現，原來當地嘅《鐵拳》愛好者唔太鍾意上網對戰，而係會去類似機鋪嘅地方一齊打。而又由於有一眾水平接近嘅同好者面對面交流，大家互相幫助就進步得多。Chikurin就話近來日本機鋪買少見少，大家都習慣返屋企線上對戰，或者就係日本選手輸畀Arslan Ash嘅原因。於是佢返到日本後都積極約其他選手進行線下集訓，彌補不足。

即使你唔係競技級別嘅選手，但應該都仲會記得當年去朋友屋企一齊打機嘅日子，依家線上見的確係方便咗，但又係咪好似冇以前咁開心呢？