萬眾期待嘅Christopher Nolan新作《TENET天網》經過多次延期多未能上映，早前發行商Warner Bros.就表示會放棄「傳統的全球同步上映」，最新就公佈詳情，會將全球劃分成六個階段，橫跨4個星期上映。而大家最關心嘅香港，將會於8月27日上映。

早前《TENET》因為堅持全球同時上映，但礙於疫情反覆，各個地區尤其北美嘅戲院一直未能重開，故上映日期一推再推。今次採用分階段上映後，相信至少有部份地區能夠成功上映。據《Variety》報導，名單中第一階段(8月26日)中要為歐洲地區，包括英國、意大利、荷蘭、法國、葡萄牙以及東歐、北歐各國。值得一提嘅係韓國及印尼亦屬第一階段，令其成為成個亞洲最早睇到嘅地區。

第二階段(8月27日)則包括澳洲、加拿大、德國以及多個中東國家，而香港、台灣、新加坡、泰國、馬來西亞亦屬此階段。

而作為發行商最重視嘅美國本土，就要等到足足一個星期後嘅9月3日先會上映，目前時間表上最後一個上映地區則為9月18日嘅日本。而中國上映日期未定。

早前公佈嘅香港版海報

喺目前全球疫情反覆的情況下，分階段上映難度自然比全球同步要低得多，但亦表示片商要面對網上盜版及劇透問題。同時以香港嘅情況黎睇，8月27日話長唔長話短唔短，邊個講得埋到時戲院仲開唔開？