《TENET》一而再、再而三延期，搞到大家睇咗條預告幾個月，都係唔知到套戲實際上係講咩。不過唔緊要，我哋可以睇下佢哋喺入面係戴咩嘅。講緊嘅係Hamilton為《TENET》製作嘅Khaki Navy BeLOWZERO。

Hamilton早曾於《Interstella》與Christopher Nolan合作，今次佢哋亦為《TENET》特意製造出一者Khaki Navy BeLOWZERO作拍攝道具用，當中更加為配合電影而加入幾項特別功能，品牌製錶大師仲去到拍攝現場跟Shoot支援，可見電影中嘅腕錶似乎都有唔輕嘅作用。咁辛苦整隻錶出黎冇理由唔賣架係咪？所以就推出呢隻「Hamilton BeLOWZERO Titanium Limited Edition Blue」及「Limited Edition Red」。

兩者都係用上46mm 黑色 PVD 塗層鈦金屬錶殼，再加上黑色錶盤、配上灰色Super LumNova塗層嘅黑色時分針，外型非常硬朗。兩者最大分別係秒針尖端分別為藍色及紅色，亦係《TENET》中嘅經典配色。內配H-10自動上鍊機芯、80小時動力儲存。100米防水。

當然，電影入面有嘅功能，現實中呢兩隻就冇嘅，但為咗向電影致敬，每隻都只係限量888隻。你問點解係888隻？品牌話係呼應「TENET」呢個順讀、逆讀都係咁讀嘅電影名喎。但隻錶個包裝就係《TENET》電影製作設計師 Nathan Crowley 配合電影而創作，唔知套戲入面係咪都係咁嘅樣呢？