《鬼滅之刃 無限列車》於日本大收旺場，喺香港亦掀起一陣熱議，原本口裏說不身體卻很老實嘅中國觀眾去到12月尾或一月頭都有機會親身入場睇，但最新消息就指上映日子會大幅延期——而原因，竟然係同《Monster Hunter》有關。

大家應該知道早前因為戲中MC Jin一句「Look at my knees」、「Chinese」而令Sony嘅《Monster Hunter》電影被中國當局火速下架，而且由於中國網民指責中國當局冇做好審查，所以中國國家電影局要求重新審查即將上映嘅電影，當中就包括《無限列車》及同樣預定今年年尾於中國上映嘅《Fate/stay night [Heaven's Feel] III.春櫻之歌》。

雖然兩部電影理應唔會有任何冒犯中國觀眾敏感心靈嘅內容，但中國國家電影局審查一向都唔快，換言之兩部日本動畫電影都好有可能無法於原定日期上映。更重要嘅係，中國當局規定農曆新年期間禁止外國電影上映，所以《無限列車》及《春櫻之歌》都好可能要等到2月尾3月頭先再有機會上映。