首先,「高潮過後體內分泌大量泌乳素」並唔係男人嘅專利——睇個名你都知呢種賀爾蒙嘅主要作用係刺激女性分泌乳汁——但女性就唔會出現「聖人模式」,甚至能夠「長做長有」;另一邊廂,泌乳素對於唔會分泌乳汁嘅男性有咩用,亦一路都係個謎。於是葡萄牙「Champalimaud未知研究中心」嘅研究員就希望於高潮過後同樣有「聖人模式」、泌乳素增多等現象嘅白老鼠身上搵出泌乳素嘅作用。
結果就發現,無論研究員增加或減少白老鼠體內嘅泌乳素,都對佢哋嘅回氣時間以至性欲毫無影響,回氣快嘅白老鼠繼續快、回氣慢嘅亦繼續慢。研究員指「我哋嘅研究證明泌乳素好有可能唔係聖人模式嘅成因」。
|