MB&F推出嘅Horological Machine，最具特色嘅就係其堪稱「怪」嘅外表，而其中2010年推出、源自Horological Machine N°3、外型非常似一隻卡通青蛙嘅HM3「Frog」更係品牌代表作。不過自2010年推出以來，HM3都未有重要更新——直到今日，MB&F終於推出「FrogX」。

驟眼睇「FrogX」同「Frog」分別不大，兩隻半球體大眼分別係小時及分鐘轉盤、下面個「咀」就係品牌著名嘅戰斧造型自動盤，不過如果仔細睇，就會發現「FrogX」參照「HM3 Megawind」嘅設計，放棄日期顯示令自動盤得以放大，亦令HM3機芯首次公開全貌。

而「FrogX」嘅另一大特色，就係除咗兩隻「眼」用上兩個半圓形藍寶石水晶，就連錶殼上半部亦係用藍寶石包裹，而且整個錶殼一體成型。用藍寶石嘅好處自然係清晰及防刮，但同樣係因為呢兩個特性，令製作呢個藍寶石錶殼變得非常困難。MB&F話即使佢哋有15年處理藍寶石嘅經驗，都要用幾個星期先做好一個藍寶石錶殼。

而錶內則同樣使用製錶大師Jean-Marc Wiederrecht以芝柏（Girard-Perregaux）機芯為設計基礎而製作嘅HM3機芯，共有277枚零件及36粒寶石，當然亦有標誌性嘅22K金及鈦合金戰斧造型自動盤，配上與錶殼防水墊相應的顏色。而HM3 FrogX 10週年限量藍寶石水晶版，有藍、紫、綠三色，每色限量十隻。