迪士尼動畫電影陪伴過唔少人成長，大家或多或少都睇過幾套，就算唔睇公主系列都睇過《小飛象（Dumbo）》或《獅子王（The Lion King）》。最近迪士尼串流平台Disney+因「政治正確」將多部經典動畫列為「7歲以下禁止觀看」，從兒童專區下架，但成人仍然可以睇到。

據《每日郵報》報導，英國有家長畀咗5.99英磅月費買Disney+，打算同個女一齊睇《小飛俠（Peter Pan）》，但喺兒童專區搵極都搵唔到，後來先意識到原來迪士尼將幾套經典動畫電影從兒童專區下架，令佢好震驚。據了解，原來迪士尼因為相關動畫情節涉及種族歧視，所以將佢哋從兒童專區移除，當中包括《小飛象（Dumbo）》、《小飛俠（Peter Pan）》、《小姐與流氓（Lady and the Tramp）》、《魔幻森林（The Jungle Book）》。

《富貴貓》片中嘅暹羅貓「雪剛（Shun Gon）」，黃毛鈄眼暴牙用筷子彈鋼琴形象被指描繪成亞洲人。

《小飛俠》片中因為稱呼美洲原住民「紅蕃（redskins）」而被指歧視。（圖片：Disney Wiki）

其實上年10月，迪士尼已經開始喺部份動畫電影添加「涉及種族歧視」提示警告。而將呢啲動畫喺兒童專區刪除，就係迪士尼搵返嚟嘅專家評估內容是否「代表全球觀眾（represented global audiences）」而決定。