香港成日被人話係文化沙漠，有書展但無書文化，書展賣補充練習同旅行書仲多過文學，紙醉金迷嘅社會下大家只識搵錢，放假就諗去邊到旅行，實情又係咪咁呢？確實，過往公共圖書館及各大書店暢銷排行榜上有唔少財經旅行書，人文小說類書籍幾乎無人問津，但近年閱讀風氣開始漸漸改變。

（圖片截至：立場新聞）

上年對大家嚟講都係難捱嘅一年，出街要載曬口罩提心吊膽，連搭車都唔敢掂扶手，長期處於緊張狀態，留喺屋企更甚留喺香港時間最長嘅一年。早排誠品公布2020年年度閱讀報告，香港暢銷排行榜中見到唔少勵志及人文社科類別嘅書，彷彿反映過去一年香港人心理狀態。

過去一年口罩變到同鎖匙一樣，成為出街必備品。

排行榜三甲均為社運書籍，分別係柳俊江嘅《元朗黑夜》、譚蕙芸嘅《天愈黑，星愈亮》及李怡嘅《香港覺醒》，以報導文學記錄社會變遷。接著落可以見到數本治癒心靈嘅散文或詩集，為正值意志消沉嘅讀者帶嚟一絲溫暖，提起勇氣面對難過日子。

疫情加上限聚令，唔少人都多咗自己煮下飯仔或整甜品，各位呢段時間廚藝係咪都特突飛猛進？由知名烹飪Youtuber馬田所寫嘅甜品書《馬田帶你解構甜點》都有上榜，書中收錄多款甜品教學，各位男士未諗到情人節點算不如考慮下整返個甜品畀女友（唔好整個太難，fail咗可能會有反效果）。

日本漫畫大家就睇太多，本地漫畫又識幾多？除咗古惑仔、火鳳燎原等經典佬味漫畫，近年本地插畫及漫畫家門小雷大受「文青」追棒，筆下創作多數以女性為主，盡顯女性魅態。

排行榜亦有人文類書藉，由「好青年荼毒室」所出嘅《大時代的哲學》，內容以哲學角度探討呢個時代大各個重要命題。近年佢哋愈嚟愈紅，打破固有哲學「清高離地」嘅形象，以簡單易明嘅文字推動哲學普及。

香港誠品2020暢銷排行榜：

1.《元朗黑夜—我的記憶和眾人的記憶》柳俊江

2.《天愈黑，星愈亮—反修例運動的人和事》 譚蕙芸

3.《香港覺醒》 李怡

4.《離開以後，你有沒有更自由》 middle

5.《所有溫柔都是你的隱喻》 不朽

6.《馬田帶你解構甜點》 馬田

7.《大時代的哲學》 好青年荼毒室

8.《SISTERHOOD：門小雷精選作品集》 門小雷 (Little Thunder)

9.《這世界很煩，但你要很可愛》 萬特特／ 等

10.《後來的你，好嗎？》Peter Su