雖然IWC深受錶迷愛戴，但又唔代表佢每一隻錶都一樣咁受歡迎。1994年推出、型號3705嘅陶瓷飛行員計時腕錶「IWC Fliegerchronograph Keramik」雖然係當時首隻枚以黑色氧化鋯陶瓷打造錶殼嘅飛行員計時腕錶，但推出時就賣唔去，幾年間只係賣出1000隻，最後停產收場。

風水輪流轉，廿幾年後嘅今日，當年賣唔去嘅3705因為獲得錶界人士推薦而聲名大噪，IWC亦承勢推出「致敬3705」嘅「Black Flieger」。

當年嘅3705經過年月洗禮，時標及指針變成橙色，配上黑色陶瓷錶殼展現獨特味道，深受錶迷追捧，其中一杖來自品牌前董事嘅3705就曾於拍賣會上以53,750美金賣出。而型號為387905嘅「致敬3705」，就係向呢隻等咗廿幾年先有人賞識嘅前輩致敬之作。錶面佈局基本還原3705，最大分別係原本位於6點位置嘅小時計時盤、同原本位於9點位置嘅秒盤交換位置。

錶殼雖然都係黑色，但物料就由當年嘅氧化鋯陶瓷變成以IWC專利材質「瓷化鈦金屬」，既有鈦金屬嘅輕巧、又有陶瓷嘅堅硬抗刮。錶芯亦由當年嘅Vaijoux 7750換成IWC自家69380自動機芯，提供46小時動力。

講咗咁耐，大家係咪唔知篇文條題會話IWC「記仇」呢？仲記得我話3705當年只係賣咗1000隻嗎？唔知係咁啱得咁橋，定IWC想「紀念」呢個銷售數字，所以「致敬3705」都係限量1000隻，感覺就好似同班錶迷講，當年你哋唔識貨，依家係咪慢慢搶囉——以上對話純屬我個人虛構，不代表其他人真實想法呀下——BTW如果你想搶，記住隻錶係IWC.com獨家發售。