近一年全球疫情催旺外賣行業，全球餐飲外賣平台飛躍，但一般外賣都受到距離限制，通常大家叫外賣都係同區食店，不過英國最東南端白禮頓（Brighton）就有間當地享負盛名日本拉麵店因疫情旅遊區無客， 居然提供100公里送外賣去倫敦，由尖沙咀去上水大約37公里，計返由拉麵店送麵去倫敦大英博物館大約78公里快車都要1小時48分鐘，咁都做到抵佢有錢賺，唔怪得近來香港有人係深圳訂壽司刺身去香港食！

首先講講本次故事主角，英國Brighton一間非常出名的日本拉麵店「GOEMON Ramen Bar」，呢間鋪頭由兩位真日本人經營，原本係Brighton旅遊區營業日日高朋滿座排哂隊，但疫情加上英國進行第三度的封城，旅遊區人流稀少拉麵店無遊客幫襯生意慘淡。

如果只做本區外賣的話實在唔夠數圍，於是佢地就同一班同鄉即英國當地日本人的搬屋公司合作，推出特遠外賣服務，將外賣覆蓋範圍去到100公里以外，直達最多客路的倫敦範圍。

等去唔到旅行嘅倫敦食客喺屋企都可以食到知名日本拉麵，又有噱頭又有生意。

當然大家都應該好有興趣想知，咁遠送個外賣拉麵應該收費幾錢？又其實佢地有無計算車費油費成本？

其實佢地賣的並唔係熱食，而係全部個別包裝的拉麵Kit，據網站所示一個KIT收10英鎊叫Easily Cooking Ramen Kits，係要自己煮返熱食，而每日應跟返訂單送貨。名店加上創新服務方式讓佢地成功打出名堂，日本人尚且能屈能伸，香港人去左英國，點解會搵唔到食呢？ 起碼可以食到日式外賣拉麵！