如果你係一個重度遊戲玩家，應該都會希望可以擁有一部玩到3A大作嘅掌上遊戲機，最近小弟就喺Indiegogo發現一部遊戲機，或者能夠滿足需要。雖然呢部由中國公司製造（事先聲明）嘅掌上遊戲機AYA-NEO，驟眼睇落好似任天堂Switch，但硬件性能上就差天共地。

呢部行Windows 10作業系統嘅遊戲機（或者叫電腦？），搭載7吋1280X800IPS螢幕、AMD Ryzen 5 4500U處理器、16GB LPDDR4x RAM，有三個USB-C接口，以及長達6小時續航力電池，硬件性能彷似一部Notebook電腦。用家可以透過處理器內建嘅Radeon Vega 6繪圖核心，以60fps暢玩各部3A大作（不過要開低畫質）。

（圖片截至：Indiegogo）

有外國Youtuber就拎到AYA NEO原型機（透明殼個部）做評測，片中可以見到部機能夠以低畫質設定下以60fps流暢玩3A大作《Star Wars: Squadrons》，不過就見到打機嗰陣CPU溫度都唔低下，玩得耐分分鐘可以當暖蛋用。

雖然能夠用咁細部機仔打到3A作品好吸引，不過話曬係眾籌產品，涉及一定風險，過往亦發生過唔少眾籌計劃「走數」案例。如果大家有興趣又唔怕冒險嘅話，可以上佢哋Indiegogo個Page睇下，早鳥優惠就賣曬，依家得返1TB版本，售價為$6750港幣，預計5月開始出貨。