試想像下：你OT到9點鐘，連奔帶跑諗住飛返屋企睇住達哥送飯。返到屋企開電腦上埋Twitch，啱啱就聽到達哥唱開台歌，「開台啦　開台啦　九點半就要睇達哥」，突然達哥嗰邊傳黎一陣嘈雜聲，然後你就聽到有人大叫「呢到係香港慈母…呀唔係香港警察！入面嘅恐怖份子你哋已經被包圍，請停止衝擊否則使用暴力！」，然後達哥講咗句「嘩痴線」就比人拉咗，完！

個故事好荒謬？未必，因為如果近期喺美國好興嘅「Swatting」整蠱手法傳入香港，以上嘅聲音畫面就好有可能出現係達哥、或者其他你心愛嘅Streamer身上。

先教下生字。Streamer，係一種近年興起嘅新職業，基本上就即係打機比人睇。但同Youtuber(如司徒法正 ... 呀唔係，司徒夾帶至真)唔同嘅係，Youtuber係拍好哂、剪埋，甚至加埋Effect再放上網，而Streamer就會喺Twitchr呢啲網上平台做直播，所以可以同觀眾有即場互動(當然，好多Youtuber都有Stream，好多Streamer又有Youtuber Channel)。

而「Swatting」源自特種部隊的英文縮寫(Special Weapons And Tactics)，簡而言之就係向警方虛報某地方(通常針對某人)有嚴重罪案發生，逼使警方出動SWAT到該地址作出行動。Swatting本身唔係一件新鮮事，FBI嘅官網喺08年就已經出過文叫人唔好報假案；另一邊廂，Swatting本身亦唔係針對Streamer，Tom Cruise、Miley Cyrus、Justin Bieber同Clint Eastwood等等美國名星都曾經係受害者－－除咗Justin Bieber，佢應該係自己攞黎。

2014年8月，美國Streamer 「Jordan Mathewson」就在直播途中「被SWAT」。

Streamer之所以成為Swatting嘅新寵，原因係佢哋做緊直播。如果你報假案陷害Justin Bieber，最快都要等到出新聞你先可以見到佢個衰樣，但如果對方係一個直播緊嘅Streamer，唔單止你，仲有數以千計嘅人見證特種部隊爆門、大 喝、制服、上孖葉。對整蠱者黎講，個滿足感自然大得多。

整蠱者通常是以某種方式(如Check IP)得知Streamer嘅地址，再致電警方虛報該處有殺人、脅持、持有重型武器等等等嚴重罪行。由於接到嘅報案太緊急，警方喺接報之後只好直接出動特種部隊。直到完成行動先會知道當中虛實。縱然「被SWAT」嘅Streamer喺警方了解事件後都會被放，但絕對唔代表「Swatting」只係玩玩下。先不計每次出動特種部隊所花嘅公帑，只計對當事人嘅心理和物理損傷(起碼度門就比人爆開咗啦)，以及有關行動對周遭社區嘅影響(如上述的Jordan Mathewson被Swat時，附近的建築物、學校全都被封鎖。)，「Swatting」本身就係一項嚴重案件。