香港人對「飲茶」絕不陌生，但話就話係「飲茶」，「茶」本身卻從來都唔係大家去飲茶嘅重點，絕大部份人都係為咗啲點心而去。近來開設於中環娛樂行嘅「福和雍」就決定「撥亂反正」，雖然都有提供名廚主理嘅精緻點心，但茶先係主角。

茶館以英治時期香港開埠之初的「買辦文化」為主題，簡單黎講就即係「半唐番」，以西式優雅氣質配上港式生活習慣。作為茶館，福和雍主打嘅係來自不同地區的靚茶，當中包括白毫銀針、鳳凰單樅，來自雲南西雙版納布朗山的老曼峨，以及布朗宮廷熟茶等等，還有著名大吉嶺紅茶的始祖，來自中國武夷山的正山小種，就連香港人飲慣的黑茶、紅茶、白茶、烏龍茶都係用上優質茶葉，令大家重新認識茶味。

飲靚茶當然要配返個靚杯，茶館內嘅茶具、餐具都係由有近百年歷史的香港老品牌「粵東磁廠」所製，而且係用上麥理浩夫人當年訂製的「督花」，將港式優雅進行到底——用黎打卡都係一個唔錯嘅選擇。

鳳眼餃

下午茶

雖然福和雍主打「一盎」靚茶，但「兩件」點心亦非馬虎了事。茶館請來前福臨門老師傅，國福樓點心部主管黃志生師傅親自主理，提供「韭菜炸蟹盒」、坊間少見嘅「鳳眼餃」、「蛋黃千層糕」等特色點心。更有參考英式下午茶的咸甜糕點點心套餐，食客更可嘗試親手沏茶。

另外福和雍亦有開設「福和雍 洋莊茶號」，販售茶館內的茶葉及「粵東磁廠」瓷器。

開幕日期：2021年4月5日

營業時段：早上11時至晚上8時

《福和雍 洋莊茶號》

開幕日期：2021年6月

地址：中環皇后大道中30號娛樂行2樓