美國加州迪士尼樂園於上月底重新開放，白雪公主園區新設施「Snow White’s Enchanted Wish」隨即惹來爭議。有外媒批評新設施重現「王子吻公主」一幕係教壞細路，認為王子趁公主昏迷嗰陣親吻對方，並唔係真愛嘅表現，我哋都教細路要兩情相悅先可以親吻對方。

新設施「Snow White’s Enchanted Wish」（圖片截自：SF Gate）

由於疫情問題，加州迪士尼樂園停業超過一年，為咗增加吸引力，迪士尼就喺閉園期間翻新白雪公主園區，增設新設施「Snow White’s Enchanted Wish」，重現白雪公主故事場景，當中就包括「王子吻公主」經典一幕。

新設施入面「王子吻公主」一幕。（圖片截自：SF Gate）

不過呢個舉動就引起外媒「SF Gate」編輯Katie Dowd及Julie Tremaine不滿，佢哋認為王子趁公主昏迷嗰陣親吻對方，唔係真愛嘅表現，並表示「我哋唔係都教小朋友，要雙方同意先可以錫對方嘅咩？我真係唔明，點解到咗2021年，仍然可以將男人對女人做咩都得嘅守舊想法加入園內。」

經典遊樂設施「Splash Mountain﹙飛濺山﹚」

其實近年迪士尼樂園都被人鬧過幾次，園內經典遊樂設施「Jungle Cruise（叢林巡航）」就曾被指涉嫌種族歧視，將原住民塑造成野蠻人同食人族。而另一個經典設施「Splash Mountain﹙飛濺山﹚」，由於概念源至一套被指「美化奴隸制」嘅電影《Song of the South（南方之歌）》而被鬧爆，最終迪士尼以黑人少女做主角嘅電影《The Princess and the Frog（公主與青蛙）》重新包裝嚟平息爭議。